Yoga Vasistha — Nirvana Prakarana Purva (Liberation, Part 1), Sarga 11, Verses 79–84

शक्तिरुद्गमनीयान्तस्तच्चिद्ब्रह्माहमाततम् । खर्जूरनिम्बबिम्बानां स्वयमात्मनि तिष्ठताम् ॥ ७९ ॥ या स्वादसत्ता लीनान्तस्तद्ब्रह्म चिदहं समः । खेदानन्दविमुक्तान्तः संवित्तिर्मननोदया ॥ ८० ॥ लाभालाभविधौ तुल्या चिद्ब्रह्मास्मि निरामयम् । यावद्भूम्यर्कमेतावद्दृष्टिसूत्रं यदाततम् ॥ ८१ ॥ तन्मध्यसदृशं शान्तं निर्मलं चिदहं ततम् । जाग्रत्यपि सुषुप्तेऽपि तत्स्वप्नेऽपि तथोदितम् ॥ ८२ ॥ तुर्यं रूपमनाद्यन्तं चिद्ब्रह्माहमनामयम् । पुंसां क्षेत्रशतोत्थानामिक्षूणां स्वादुवत्स्थितम् ॥ ८३ ॥ सर्वेषामेकरूपं तच्चिद्ब्रह्मास्मि समः स्थितः । सर्वगा प्रकृता स्वच्छरूपा भानोरिव प्रभा ॥ ८४ ॥