Yoga Vasistha — Utpatti Prakarana (Creation), Sarga 42, Verses 29–34

श्रीवसिष्ठ उवाच । इति प्रोक्ते सरस्वत्या गिरा मधुरवर्णया । उवाच वचनं धीमान्भूमिपालो विदूरथः ॥ २९ ॥ विदूरथ उवाच । ममापि दर्शनं देवि मोघं भवति नार्थिनि । महाफलप्रदायास्तु कथं तव भविष्यति ॥ ३० ॥ अहं देहं समुत्सृज्य लोकान्तरमितोऽपरम् । निजमायामि हे देवि स्वप्नात्स्वप्नान्तरं यथा ॥ ३१ ॥ पश्यादिशाशु मां मातः प्रपन्नं शरणागतम् । भक्तेऽवहेला वरदे महतां न विराजते ॥ ३२ ॥ यं प्रदेशमहं यामि तमेवायात्वयं मम । मन्त्री कुमारी चैवेयं बालेति कुरु मे दयाम् ॥ ३३ ॥ श्रीसरस्वत्युवाच । आगच्छ राज्यमुचितार्थविलासचारु प्राग्जन्ममण्डलपते कुरु निर्विशङ्कम् । अस्माभिरर्थिजनकामनिराकृतिर्हि दृष्टा न काचन कदाचिदपीति विद्धि ॥ ३४ ॥