Yoga Vasistha — Utpatti Prakarana (Creation), Sarga 41, Verses 29–33

परिज्ञाता प्रसादेन देव्योरिह मयाधुना । राजोवाच । हे देव्यौ किमिदं नाम दिनमेकं मृतस्य मे ॥ २९ ॥ गतमद्येह जातानि वयो वर्षाणि सप्ततिः । स्मराम्यनेककार्याणि स्मरामि प्रपितामहम् ॥ ३० ॥ स्मरामि बाल्यं तारुण्यं मित्रं बन्धुपरिच्छदम् । ज्ञप्तिरुवाच । राजन्मृतिमहामोहमूर्च्छायाः समनन्तरम् ॥ ३१ ॥ तस्मिँल्लोकान्तरेऽतीते तस्मिन्नेव मुहूर्तके । तस्मिन्नेव गृहे चास्मिन्नेव व्योम्न्यपि सद्मनि ॥ ३२ ॥ अयं तस्य गृहस्यान्तर्व्योमन्येव किल स्थिते । गिरिग्रामकविप्रस्य गृहेऽन्तर्भूप मण्डपः ॥ ३३ ॥