Yoga Vasistha — Utpatti Prakarana (Creation), Sarga 117, Verses 21–24

चिरसंदर्शनाभावादप्रफुल्लवृहद्वपुः । स्वप्नो जाग्रत्तया रूढो महाजाग्रत्पदं गतः ॥ २१ ॥ अक्षतेवाक्षते देहे स्वप्नजाग्रन्मतं हि तत् । षडवस्थापरित्यागे जडा जीवस्य या स्थितिः ॥ २२ ॥ भविष्यद्दुःखबोधाढ्या सौषुप्ती सोच्यते गतिः । एते तस्यामवस्थायां तृणलोष्टशिलादयः ॥ २३ ॥ पदार्थाः संस्थिताः सर्वे परमाणुप्रमाणिनः । सप्तावस्था इति प्रोक्ता मयाऽज्ञानस्य राघव ॥ २४ ॥