Yoga Vasistha — Nirvana Prakarana Uttara (Liberation, Part 2), Sarga 157, Verses 32–36

मुनिरुवाच । एवमुक्तः स तेनाथ सिन्धुरुद्धुरया धिया । तदा तत्र तथा नाम राष्ट्रं त्यक्ष्यत्यशेषतः ॥ ३२ ॥ गमिष्यति वनं दूरं प्रार्थितोऽपि हि मन्त्रिभिः । नाश्रयिष्यति तद्भूयो राज्यमुच्छिन्नशात्रवम् ॥ ३३ ॥ तिष्ठतः साधुमध्येऽस्य तद्विवेककथावशात् । पुष्पासङ्गादिवामोदो विवेकः समुदेष्यति ॥ ३४ ॥ ततः कथमिदं जन्म कुतः संसार आगतः । इत्थं विचारसांतत्यात्स यास्यति विमुक्तताम् ॥ ३५ ॥ नित्यं विचारणपरोऽथ भवन्स सिन्धुः सत्सङ्गमेन पदमाप्स्यति पावनं सः । तद्यत्र पत्रमिव वातविधूयमानं नो वस्तुतां व्रजति काचन नाम लक्ष्मीः ॥ ३६ ॥