Yoga Vasistha — Nirvana Prakarana Purva (Liberation, Part 1), Sarga 90, Verses 19–26

सर्वत्यागमणावेवं गते कमललोचन । तपःकाचमणिर्दृष्टस्त्वया संकल्पचक्षुषा ॥ १९ ॥ त्वया तस्मिंस्तपस्येव दुःखे दृष्टिभ्रमोदिते । ग्राह्यैकभावना बद्धा जलेन्दौ शशिनो यथा ॥ २० ॥ अवासनमनासक्त्या कृतानन्ता सवासना । आद्यन्तमध्यविषमा दुःखायैव तपःक्रिया ॥ २१ ॥ अमितानन्दमुत्सृज्य सुसाध्यं यः प्रवर्तते । मिते वस्तुनि दुःसाध्ये स्वात्महा स शठः स्मृतः ॥ २२ ॥ सर्वत्यागं समारभ्य न चैष साधितस्त्वया । तथा दुःखैकताज्ञानबद्धेन वनसद्मनि ॥ २३ ॥ राज्यबन्धाद्विनिष्क्रम्य प्रसरदुःखपूरितात् । वनवासाभिधैः साधो बद्धोऽसि दृष्टबन्धनैः ॥ २४ ॥ द्विगुणा एव ते चिन्ताः शीतवातातपादयः । बन्धनादधिकं मन्ये वनवासमजानताम् ॥ २५ ॥ चिन्तामणिर्मया प्राप्त इत्यलं बुद्धवानसि । न लब्धवान्भवान्साधो स्फटिकस्यापि खण्डिकाम् ॥ २६ ॥